Անալիզ հանձնելուց առաջ...
Բժշկական որոշումների մեծ մասը կախված է պացիենտի լաբորատոր հետազոտության արդյունքներից: Իսկ սա նշանակում է, որ բժշկին տրամադրվող լաբորատոր պատասխանները պետք է առավելագույնս համապատասխանեն պացիենտի առողջական վիճակին:
Խնդրում ենք նկատի ունենալ, որ լաբորատոր պատասխանները կարող են շեղվել ոչ միայն որպես հիվանդության հետևանք, այլ նաև հետազոտությանն անպատրաստ ներկայանալու պատճառով:
Այսպիսով, կան որոշ կանոններ, որոնց պահպանելը էապես կբարելավի լաբորատորիայից ստացված արդյունքների հուսալի լինելը: Եկեք ծանոթանանք դրանցից ամենակարևորներին:
Արյան հետազոտություն
- Բազմաթիվ, եթե ոչ բոլոր հետազոտությունների դեպքում ամենակարևոր պայմանը արյան նմուշը քաղցած վիճակում հանձնելն է: Օրինակ, արյան գլյուկոզայի կամ լիպիդային պրոֆիլի (խոլեսթերինն իր ֆրակցիաներով) հետազոտությունից առնվազն 10-12 ժամ առաջ պացիենտը պետք է և ոչ մի տեսակի սնունդ (անգամ՝ փոքր չափով) ընդունած չլինի՝ բացառությամբ ջրի:
- Հետազոտվելու նախորդ օրը, առավել ևս՝ բուն հետազոտման օրն անհրաժեշտ է հնարավորինս զերծ մնալ ծանր ֆիզիկական աշխատանքից: Ֆիզիկական ծանրաբեռնվածությունը և կմախքային մկանուքի «հոգնած» լինելը կարող են ժամանակավորապես փոփոխել լաբորատոր որոշ ցուցանիշների մակարդակը:
- Նույն կերպ, արյունը հանձնելուց առաջ պացիենտը պետք է լինի հանգիստ վիճակում: Որոշ անձանց մոտ բուժհաստատություն այցելելիս, ներարկիչ և ասեղ տեսնելիս առաջանում է անհանգստություն, տագնապ կամ վախ, որոնք հաշված րոպեների ընթացքում կարող են «արյան պատկերը» փոփոխել: Այնպես որ, լաբորատորիա այցելելիս պետք չէ շտապել՝ բուժհաստատությունից «շուտ փախչելու» միտքը գլխում: Պետք է նստել, հանգստանալ մի քանի րոպե: Գուցե օգտակար լինի մյուս հետազոտվողներին «կողքից զննելը»:
Մեզի հետազոտություն
- Մեզը հավաքելուց առաջ անհրաժեշտ է իրականացնել արտաքին սեռական օրգանների մանրակրկիտ լվացում:
- Եթե առանձին ցուցում չեք ստացել, ապա մեզի հետազոտության համար ընդունելի է միայն առավոտյան մեզի հանձնումը: Սովորաբար, լավագույնը միզելուց մեզի միջին չափաբաժինների հավաքումն է:
- Եթե մեզը հավաքվում է տանը, ապա այն լաբորատորիա պետք է բերել սենյակային ջերմաստիճանի պայմաններում պահելիս՝ մինչև 2 ժամվա, իսկ սառնարանային (2-8oС) պայմանների դեպքում՝ մինչև 5-6 ժամվա ընթացքում:
- Մեզի նմուշը պետք է հանձնել միանգամյա օգտագործման փակ անոթում: Այն Ձեզ կտրամադրվի մեր կենտրոնում (հակառակ դեպքում կարող եք գնել դեղատներում):
- Կանայք հնարավորինս պետք է հրաժարվեն դաշտանի փուլում մեզի հետազոտությունից (դաշտանային արտազատուկների՝ մեզում հայտնվելու հավանականություն):
- Մեզի հետազոտությանը նախորդող մեկ օրվա ընթացքում արգելվում է մեզի գույնը փոփոխող սննդի (բազուկ, գազար), ալկոհոլի կամ դեղերի ընդունումը (այդ թվում՝ միզամուղներ):