Արյան ընդհանուր հետազոտություն
Արյան ընդհանուր հետազոտությամբ (ԱԸՀ) ստացվում են արյան ձևավոր տարրերի վերաբերյալ կլինիկորեն կարևոր ցուցանիշներ: Ընդհանուր կլինիկական այս հետազոտության ցուցանիշներից է նաև էրիթրոցիտների նստման արագությունը (ԷՆԱ, СОЭ):
Արյան ընդհանուր հետազոտությունը կարևորվել է տասնամյակներ շարունակ և այսօր էլ չի կորցրել իր դերն ու նշանակությունը: Այս հետազոտությունն անցկացվում է՝ հայտնաբերելու արյան ձևավոր տարրերի և դրանց առանձին տեսակների քանակական փոփոխությունները, որոնք ի հայտ են գալիս բազմաթիվ հիվանդությունների դեպքում՝ սակավարյունություն, արյան տարբեր հիվանդություններ, բորբոքումներ և այլն:
Արյան ընդհանուր հետազոտությունը համարվում է կանխարգելիչ բժշկական ստուգումների թիվ մեկ թեստը, քանի որ բազմաթիվ հիվանդություններ մինչև կլինիկապես դրսևորվելն ուղեկցվում են արյան ձևավոր տարրերի և ԷՆԱ-ի տեղաշարժով:
ԱԸՀ ցուցանիշները
- Էրիթրոցիտներ (բացարձակ թիվ)
- Հեմոգլոբին (բացարձակ թիվ)
- Հեմատոկրիտ (բացարձակ թիվ)
- Լեյկոցիտներ (բացարձակ թիվ)
- Նեյտրոֆիլներ (բացարձակ թիվ և %)
- Լիմֆոցիտներ (բացարձակ թիվ և %)
- Էոզինոֆիլներ, մոնոցիտներ, բազոֆիլներ (բացարձակ թիվ և %)
- Թրոմբոցիտներ (բացարձակ թիվ)
- Էրիթրոցիտների նստման արագություն (ԷՆԱ, СОЭ)
- Արյան ձևավոր տարրերի վերաբերյալ այլ կարևոր ցուցանիշներ
Մենք մշակել ենք լաբորատոր ցուցանիշների առցանց շտեմարան, որը կօգնի Ձեզ հասկանալու յուրաքանչյուր լաբորատոր թեստի էությունը և ստացված արդյունքների նշանակությունը:
Հաճախակի տրվող հարցեր
- Երակային, թե՞ մազանոթային (մատից) արյուն է հանձնվում:
Մեր լաբորատորիայում արյան ընդհանուր հետազոտության համար վերցվում է երակային արյուն:
- Անվտա՞նգ է արդյոք երակային արյան հանձնումը:
Գործնականում, վենեպունկցիան (ասեղով երակի լուսանցքը ծակելը) և երակային արյան նմուշառումը անվտանգ են: ԱԸՀ համար անհրաժեշտ է հանձնել չնչին քանակի՝ 3-5 մլ երակային արյուն: Սա բնավ չի կարելի համարել արյան կորուստ, ուստի և չի կարող հանգեցնել արյան պակասի: Մեր կենտրոնում արյան նմուշառման բոլոր պարագաները մեկանգամյա օգտագործման են (ասեղներ, փորձանոթներ և այլն): Ձեզնից երակային արյուն կվերցնի հմուտ ու փորձառու բուժքույրը:
- Ի՞նչ սարքով է իրականացվում ԱԸՀ:
Մեր կենտրոնում արյան ընդհանուր հետազոտությունը կատարվում է ինչպես Mindray® BC-2300 Hematology Analyzer սարքով, այնպես էլ, ըստ անհրաժեշտության, մանրադիտակային զննմամբ:
- Որո՞նք են արյան ձևավոր տարրերը:
Արյան ձևավոր տարրերն են՝ արյան կարմիր գնդիկներ (էրիթրոցիտներ), արյան սպիտակ գնդիկներ (լեյկոցիտներ) և արյան թիթեղիկներ (թրոմբոցիտներ):
- Ի՞նչ է լեյկոգրամման կամ «լեյկոցիտար բանաձևը»:
Արյան ձևավոր տարրերից լեյկոցիտներն իրենց հերթին լինում են տարբեր տեսակի՝ նեյտրոֆիլներ, լիմֆոցիտներ, մոնոցիտներ, բազոֆիլներ և էոզինոֆիլներ: Լեյկոգրամման լեյկոցիտների այս հինգ տեսակների առանձին տողերով բացարձակ քանակների հաշվումն է, ինչպես նաև ընդհանուրի մեջ դրանց տոկոսային հարաբերության ներկայացումը:
- Հավաստի՞ են արդյոք լաբորատոր հետազոտության արդյունքները:
Մենք երաշխավորում ենք մեր կենտրոնում իրականացված լաբորատոր հետազոտությունների պատասխանների ճշգրիտ լինելը:
- Ե՞րբ կարող եմ ստանալ լաբորատոր հետազոտության արդյունքները:
Արյան ընդհանուր հետազոտության պատասխանը տրամադրվում է հետազոտության օրը:
- Կարո՞ղ եմ արդյոք լաբորատոր արդյունքները ստանալ էլ. փոստով:
Այո, ըստ այցելուի ցանկության մենք ուղարկում ենք լաբորատոր հետազոտությունների պատասխանները նաև էլեկտրոնային միջոցներով: